إبراهيم سعيد يوضح حقيقة تمرده على الأهلي ويحسم الجدل حول ضرب طارق سليم له

الموجز  

كشف إبراهيم سعيد لاعب منتخب مصر السابق، حقيقة تمرده على النادي الأهلي، وضرب مدير الكرة بالفريق الراحل طارق سليم له قبل رحيله.

وفي حواره ببرنامج “العرافة” الذي يعرض على فضائية “النهار” أمس الخميس، قال سعيد: "النادي الأهلي ده بيتي، مفيش حد بيتمرد على بيته، كان نفسي المعاملة اللي اتعاملوا بيها مع اللاعبين اللي مش ولاد النادي وسابوه في فترات صعبة أكتر مني كان نفسي المعاملة دي تبقى معايا".

وأضاف نجم منتخب مصر السابق: "لو كنت اتعاملت المعاملة دي، كنت هعيش وأموت في الأهلي وأبقى هناك لآخر نفس، وأنا مسامح"، وردت عليه بسمة وهبة، قائلة: "بس محدش رجع فيهم على فكرة".

وتراجع إبراهيم سعيد عن حديثه قائلا: "خلاص أنا مسامح على فكرة.. أنا مسامح".

كما كذب إبراهيم سعيد تصريحات وليد صلاح الدين لاعب النادي الأهلي الأسبق بأن طارق سليم مدير الكرة الأسبق للنادي ضربه بسبب شجارهما.

وأوضح سعيد: "كابتن طارق سليم مضربنيش خالص، وحتى لو ضربني شرف ليا، ولو كابتن طارق سليم أو أي حد ضربني فده شرف ليا".

وأضاف: “أسلوب الضرب ده في النادي الأهلي، حصل مشادة بيني وبين وليد صلاح الدين واعتذرت له وبعتذر له تاني لو كان زعلان مني، وإيه المشكلة إني أغلط، ما كلنا بنغلط، الناس اللي هتحاسب ولا ربنا؟!”.

وأكد سعيد: "أنا زعلان إن الظروف مساعدتنيش ومحدش عرف يحتويني ولا يتعامل معايا، وكان حقي أتدلع في بيتي لأني متربي فيه من وأنا عندي 8 سنين، وفين الأب والأم والأصدقاء كانوا ممكن يلموا؟!".

وعن تضارب تصريحاته ما بين دعمه للنادي الأهلي ونادي الزمالك، أوضح: "في الفترة اللي كنت بقول فيها إني زملكاوي طلعت معاكِ وكنت برمي كلام عشان أوصل للناس كلام إني أهلاوي بس محدش واخد باله".

وواصل: "قلت أنا زملكاوي عشان كنت زعلان من الأهلي بس أنا أهلاوي متعصب جدا، ليه الناس دايما مش بتراعي الحتة النفسية، اللي أنا كنت زعلان من المكان اللي اتربيت فيه".

وأضاف إبراهيم سعيد: "في الأهلي، يعلم الجميع أنني غادرت المكان مكرها، وكان من حقي أن أغضب، ومن حقهم أن يغضبوا مني أيضا، والله ما كنت عاوز أمشي من الأهلي، وأنا صغير كنت بشيل الطوب عشان النادي يتبني بيه، وفي الآخر مشيت غصب عني وبمشاكل".