جابت جوزها بدالي في دور .. نيللي كريم ترد على باسم سمرة: الكلام ده مش حقيقي
الموجز
ردت الفنانة نيللي كريم خلال لقاء مع برنامج "تفاعلكم" على تصريحات الفنان باسم سمرة في برنامج "رامز جاب من الآخر" بعدما تحدث عن عمل كان سيجمعهما لكنه رفضه لأنها طلبت مشاركة زوجها الفنان هشام عاشور، فضلا عن حديثه أنها تعلمت منه التمثيل.
وقالت الفنانة نيللي كريم نافية ما ذكره باسم : "الكلام ده محصلش أنا آخر مرة اشتغلت مع باسم سمرة في مسلسل "ذات" ودا من أكتر من 10 سنين وبعدها عمر ما جات فرصة أو أي عمل يجمعنا، الكلام اللي هو حكاه مش حقيقي".
وتابعت : "أنه بيقول إني اتعلمت منه التمثيل أنا بتعلم كل يوم لو مخرج بشتغل معاه لأول مرة أو ممثل، واتعلمت منه أه طبعا باسم أستاذ كبير، بالنسبة ليا مسلسل "ذات" كان مهم ودور يخض، وإني أتعلم منه دا شيء مش عيب، والأستاذة إنتصار طبعا اتعلم منها هي أستاذة رائعة الحاجات دي عندي مش مشكلة طول ما أنا عايشه وبشتغل في المهنة دي أنا طول الوقت هتعلم ومرديتش على الكلام دا قبل كده لأن أيوة يا نجوم يا كبار أنا بتعلم منكم وشرف ليا إني اشتغلت معاكم".
ووجهت نيللي كريم رسالة إلى الفنانة إنتصار قائلة: "أنا بس مش بحب الطريقة، ألوم على إنتصار لما قالت هي كانت بتاعة باليه وجات، بتاع الباليه مش ماشي في الشارع في أكاديمية فنون ومعهد الباليه وأنا كنت دارسة قسم إخراج مسرح، أنا مش جايه من الشارع دارسة موسيقى وباليه وفن مع ناس محترمة وأساتذة كبار".
واختتمت نيللي كريم حديثها بتحية إنتصار على دورها في مسلسل "أعلى نسبة مشاهدة".