في احتفالية بحضور السيسي.. نجوم الفن يروون ذكريات الطفولة مع عيد الفطر

الموجز  

شارك عدد من نجوم الفن، في الفيلم التسجيلي الذي عرض باحتفالية عيد الفطر المبارك، والتي حضرها الرئيس عبد الفتاح السيسي، صباح اليوم الأربعاء بالعاصمة الإدارية الجديدة، بمشاركة أبناء الشهداء.

وتحدث الفنانون عن أبرز ذكرياتهم في عيد الفطر في حياتهم السابقة، عندما كانوا بسن أصغر، حيث قال الفنان أحمد أمين: "كنا بننقش الكحك ونسرق كام كحكة من على الصينية، ويا سلام لو تطلع محشية.. بيجامة جديدة وكحكة محشية."

وتحدث الفنان أحمد حلمي عن ذكرياته مع العيدية، حيث قال: "كنت بقف في طابور العيدية زمان، ويا سلام لو ننصب ونعيد الطابور من الأول عشان تاخد كذا مرة، بس على طول كان نفسي العيدية تبقى في الـ 3 أيام العيد، كانت هتفرق أوي في مستقبلنا دلوقتي."

ووجه أحمد حلمي رسالة للشهداء، قائلًا: «لولا الشهداء مكناش هنبقى هنا النهاردة بننعم بالأمن والأمان ونعيّد وإحنا متطمنين.. عيد سعيد عليكم يارب كل أيامكم أعياد في أعياد».

وأشارت الفنانة صابرين إلى أن والدتها كانت تأخذ منها العيدية، فيما قال الفنان هشام ماجد: "كنا بنعمل كحك وبنتجمع عند جدتي بعد صلاة العيد".

وكشف الفنانة منى زكي عن ذكرياتها في العيد، حيث قالت: "لبس جديد ده كان لازم إحنا كبنات أعتقد دي حاجة أساسية وكنت بنبهر لما أشوف العيال بتلف بالمرجيحة لفة كاملة".

وأضافت: "ستات العيلة والعمارة كانوا بيتجمعوا وينقشوا الكحك والصواني رايحة جاية على الفرن وجدتي كانت بتعمل كحك في البيت وكان أحلى كحك ومن ساعنها مدوقتش أحلى من كحكها.. والعيد بالنسبالي أول كوباية شاي بلبن مع البسكويت»، مختتمة: «أولاد الشهداء أمانة في رقبتنا طول ما إحنا عايشين.. كل سنة ومصر طيبة".

أما الفنانة منة شلبي فقد تحدثت عن ذكريات العيد وقالت: "كنت ببقى محضرة اللبس وجزمتي جنب السرير وفاكرة وإحنا قاعدين بننقش الكحك وأنا أول واحدة بتاكلها وهي سخنة»، وعن الشهداء قالت: «مقامهم في قلوبنا كبير جدًا.. كل سنة وإنتوا طيبين".

كما تحدث الفنان ياسر جلال عن ذكريات العيد قائلًا: "كنا بننام نحلم إننا نصحى الصبح ونلبس الهدوم الجديدة .. أما العيدية أمي كانت عايزانا نحوش ورامز خد منها الحكاية دي.. وأول يوم العيد في الغدا كانوا يحبوا يغيروا ياكلوا فسيخ ورنجة وبصل أخضر أنا من الناس دي»، وقال في رسالته للشهداء: «بنفتخر بيكم .. كل سنة وإنتم طيبين".

وقالت الفنانة دينا الشربيني: "اللبس بيكون بايت في السرير وأفضل أبص له لحد ما أصحى علشان ألبسه.. وفاكرة شكل الصواني وهي رايحة جاية على الفرن، وكلنا قاعدين بننقش الكحك.. الشارع كله فرحان إن أول يوم العيد جه»، وقالت أيضًا في رسالتها للشهداء: «اللي ضحوا بأرواحهم وهما بيقوموا بواجبهم.. كل سنة وإنتم طيبين".

وقال الفنان أكرم حسني: "بيبقى معروف إن ده لبس عيد مش لبس عادي وعمري ما سلمت العجلة في الميعاد بتاعها.. وإحساس لما تسقي البسكويت النشادر في الشاي له طعم وريحة مختلفة.. العيد بالنسبة لي صفاء أبو السعود واهلًا بالعيد.. كل سنة وإنتم طيبين".

وعن ذكريات العيد، قالت الفنانة نيللي كريم: "العجلة أم كنبة ورا ولعب الكرة في الشارع والعيدية والفلوس الجديدة اللي ريحتها زي العربية الفبريكة»، مضيفة: «مصر هتفضل فاكرة كل أسامي أولادها الشهداء.. كل سنة وإنتم طيبين".

كما تحدثت الفنانة إسعاد يونس عن ذكريات العيد قائلة: "كنا نقف في الطابور ساعة علشان نحجز العجلة ربع ساعة وكنا نسرق كام كحكة من على الصينية وأنا كنت أرش السكر على الكحك وكنت أشيل العيدية والفلوس في الكراسة علشان تفضل الورقة مفرودة"، وقالت في رسالتها للشهداء: "أبطالنا شهداء الوطن.. بنقول لكل أولادهم كل سنة وإنتم طيبين وعيد سعيد".

واختتم الفيديو برسالة من الفنان محمد رمضان قائلًا: "وإحنا بنحتفل بالعيد النهاردة مش عايزين ننسى اللي بسببهم إحنا النهاردة بنعيد ومبسوطين ومتجمعين.. اللي ضحوا بروحهم فدانا وفدى أرضهم.. كل سنة وإنتوا في الجنة ونعيمها.. عيد سعيد وكل سنة ومصر طيبة".