مش منطقي طفل يتربي بالشكل ده .. خالد عليش ينشر فيديو مؤلم ويوجه رسالة للمسؤلين

الموجز

نشر الإعلامي خالد عليش مقطع فيديو لحظة تنفيذ حكم رؤية لأب منفصل عن زوجته .

وكتب عليش تعليق مع الفيديو جاء فيه :

ده فيديو كان منتشر لرؤية اب لطفله في وجود الام في مركز شباب عام

ملحوظة : جودة الفيديو سيئة بشكل مقصود للحفاظ علي خصوصية الطفل و الام

الفيديو بيبين حال ابهات كتير عايشين تجربة سيئة بسبب قانون الاسرة الخاص بالرؤية و الاستضافة

الطفل عايش في حضانة امه و الاب مش بيعرف يشوفه غير ساعات قليلة فقط في الاسبوع في مكان عام في وجود الام اللي بينها و بين والده خلاف كبير و عشان كده انفصلو و عايش باقي عدد ايام الاسبوع بساعاته و تفاصيله و احداثه مع الام و عيلتها  و صحابها اللي بطبيعة الحال شايفين الاب وحش كاسر ظالم ساب جنة بنتهم و عشان كده بشكل متعمد او غير متعمد مش بيقولو امام الطفل غير كلام زي الزفت عن باباه و يفرجوه قد ايه بابا عايش حياته و بيتنفس و سابنا لوحدنا و ان انتا ك طفل معدتش ال ٨ سنين الراجل الموجود و اللي باقي لينا بعد ما بابا رمى ماما
فبدون عمد و ببراءة الاطفال يكره الطفل الاب اللي ممكن يكون بيعمل كل ما في وسعه في ضوء ما سمح له القانون ان يشوف ابنه و يكبر شخص معقد كاره لابوه في صغره و كاره لامه اما يكبر و يفهم اللي عملته فيه بدون قصد
و النتيجة ابهات كتير بتستسلم عشان ما تشوفش نظرة الشماتة من الام ان ابنك بيكرهك و حسرته علي طفل بيصرف عليه كويس في التعليم عشان يعرف ازاي يكلمه بطريقة غير مهذبة
مش منطقي طفل يتربي بالشكل ده و مش منطقي ندي للام كل الصلاحيات انها تقدر ترفض ان الاب ياخد الطفل حتي من مدرسته او يسفره عشان يتفسح او غيره
لان احنا نفس بشرية و طبيعي يكون عندنا ضغينة من بعض في بعض الاوقات و النتيجة هي الطفل الصغير .

عليش يوجه طلب للمسؤلين :
الطلب بسيط رعاية مشتركة للام و الاب يكون فيها مساواة في التربية و لو العرف و كبار العيلة مش عارفين يتصرفو يكون في قانون منظم للموضوع ده
الكلام المكتوب مش بينطبق علي كل الحالات اللي موجودة حوالينا و ده السبب ان لازم يكون قانون الاحوال الشخصية منظم بشكل اكبر لضمان حق الطفل و الام و الاب
احنا مش بنتكلم عن راجل و ست احنا بنتكلم عن طفل هيبقى في يوم من الايام رجل او سيدة مجتمع

تعليقات القراء