محمود سعد عن والده: مزعلتش عليه لما مات وبيني وبينه هجر وغدر (فيديو)

كتب: ضياء السقا

أثار الإعلامي محمود سعد، حالة من الجدل على مواقع التوصل الاجتماعي، بعد حديثه عن علاقته بوالده الراحل، وما تضمنته من خلافات شديدة.

وتحدث الإعلامي عن والده، في لايف له عبر حسابه الشخصي بموقع التواصل الاجتماعي فيس بوك، قائلًا: "يوم ما انتقل والدي إلى جوار الله، كنت بقول إني مش هزعل لأن بيني وبينه هجر وغدر، وجرح في قلب، بيني وبينه طريق وفراق وطريق هو اللي بدأه".

وتابع محمود سعيد: "والدتي فضلت 27 سنة تربي في 4 عيال، مهتمتش ولا استمتعت بحياتها، أسرتها كانت عادية، لكن ربنا ساعدها، ولما والدي توفى كنت في مكتبي ووالدتي بلغتني وطلبت مني أروح له بسرعة وبالفعل سيبت الشغل ونزلت، والدي كان موصي أخويا الكبير قبل ما يموت أنه يدّفن مع جدتي من أمي لأن كان بيحبها جدًا".

وأضاف: "لما والدتي طلبت مني أنزل نعي في الجونال، قولت لها الناس متعرفش أني ليا أب أصلا لكن أمي أصرت على إننا نعمل عزا، ولما والدي توفى متأثرتش ولا كنت حاسس بحاجة، أنا حتى مش فاكر هو مات امتى، أن أبويا كان خالع نفسه من حياتنا رغم أنه كان غني".

واستكمل سعد: "ورغم إن تربية أمي نجحت ومطلعتش مجرم ولا صايع، لكن لغاية دلوقتي لما اسمع حد بيتكلم عن أبوه بتضايق، ولما كبرت بقيت أقول أبويا قالي إيه أو إيه الذكرى اللي سابهالي ملقتش حاجة".

كما حرص محمود سعد على توجيه رسالة للآباء قال فيها: "لكل أب مبيسألش على عياله، مراتك أنت وهي أحرار، لكن العيال هتكبر ومش هتنسى، هتفضل تيجي سيرتك بشكل مش كويس، وإنك تسأل على عيالك دي مش رحمة ولا مودة منك.. دا واجب، إزاي تصب غضبك من مراتك على عيالك؟".

رابط الفيديو: https://fb.watch/eH_ez7Ch2s/