خالد عليش ينتقد: إزاي يكون في تربية سليمة لطفل مش بيبات في حضن ابوه يوم واحد في الاسبوع حتي ؟.. وطليقته ترد
الموجز
هاجم الفنان والمذيع خالد عليش، عبر صفحته الشخصية على موقع التواصل الاجتماعي "فيس بوك" بعض الأمهات التي ترفض رؤية طليقها لأولاده في حالة الخلافات الأسرية الحادة وقانون طلب حق الرؤية المشروع للاب.
وقال عليش: "في حالة الخلاف الأسري الحاد و عدم وجود من يُحترم رأيه في العائلة لأي من الطرفين و عدم القدرة علي حل المشاكل الأسرية وديًا و الوصول لحائط مسدود لسوء تنظيم المسائل الاسرية بعد الانفصال خصوصا في وجود اطفال
يتم اللجوء الي القانون و طلب حق الرؤية المشروع للاب"
و تابع: "في حالة انصاف القانون ليه اوي .. هيقدر ياخد حوالي كم ساعة يشوف فيها الطفل في مكان عام بشروط معينة مع وجود الام اللي بينه و بينها حالة خلاف اصلا".
"ازاي ممكن يكون فيه تربية سليمة لطفل بيشوف ابوه كم ساعة في الاسبوع و تعنت الام انه حتي يوصل لابوه تليفونيا ؟؟
"ازاي يكون في تربية سليمة لطفل مش بيبات في حضن ابوه يوم واحد في الاسبوع حتي ؟؟
ازاي يكون في تربية سليمة لطفل القانون بيدي لأمه كل حقوقها كاملة و مش بيدي لابوه غير انه يشوفه كم ساعة و في حالة امتناع الام و رفع دعوة اسقاط حضانة توديه مرة وكأن شئ لم يكن و تبدأ الرحلة من جديد في طلب الرؤية و الطفل هو الخسران الوحيد.
ازاي طفل يعيش مبسوط و هو مش عارف يخرج او يسافر او يتفسح مع ابوه و لا حتي ابوه يكون ليه حق ياخده من المدرسة غير باذن الام عشان لو حصل يعتبر الاب خاطف لابنه.
ازاي اب يستحمل انه مش عارف يشوف ابنه و عمال يتفرج عليه علي فيسبوك مع امه في حفلات و سفر و غيره.
عشان قرر ينفصل عن امه يكون عقابه ما يشوفش طفله يعني حق ربنا سبحانه و تعالي اداهولنا و احنا بنعاقب بعض عليه.
ليه الست دائما مظلومة ؟؟
ليه رواية الست دائما صح ؟؟
ليه الست تصمم تصرف مصاريف ملهاش اي تلاتين لزمة بعد الانفصال علي الاولاد ماكنتش بتتصرف قبل كده لمجرد الادعاء بان الاب يمتنع عن الدفع !!
ليه الفيمنيست مصممين ان الست صح حتي لو مبهدلة ابنها و مانعة انه يشوف ابوه ؟؟
الاجتهاد في تربية الام للطفل و انه يروح تمارين كلها مهمة بس انه يشوف ابوه اهم بكتير .
الجملة الشهيرة دائما بتقول ان القانون مع الست طب جدة الطفل و عمته مش ستات حقهم هما كمان يشوفو الطفل اللي هو حتة منهم برضه.
متشجعوش ام مانعة اب يشوف ولاده خصوصا لو بيصرف عليهم كويس اوي و مدخلهم احسن مدارس عشان الطفل هو الوحيد الخسران في العند بينهم.
ارجو من الجميع لما اي ام تتكلم قدامك و تقول اصله ما بيشوفش باباه قولها روحي انتي وديهوله عشان حساب ربنا اقوي من اي حد
نصيحة كمان مهمة متطلقوش و معاكم اطفال في حالة عدم وجود لغة حوار بينكم عشان اكيد مش هيكون في لغة حوار بعد الانفصال
الافضل عيشو تعساء عشان العيال
اخيرا
ده مش بوست شخصي بس مهم الدولة تهتم عشان مع زيادة حالات الطلاق في اطفال كتير بتدمر نفسيا من الاب و الام و عندهم مع بعض و
حسبي الله و نعم الوكيل
نصيحة كمان مهمة متطلقوش و معاكم اطفال في حالة عدم وجود لغة حوار بينكم عشان اكيد مش هيكون في لغة حوار بعد الانفصال
طليقته ترد
وكانت الفنانة ميما الشامي طليقة الإعلامي خالد عليش شنت هجوما عليه، نافية ما قاله حول افتقاده ابنته وعدم تمكنه من رؤيتها، مؤكدة أن ذلك عاري تمامًا من الصحة وأنه يحاول دائمًا تشويه صورتها.
وكتبت ميما الشامي عبر خاصية ستوري حسابها بموقع التواصل الاجتماعي من قبل Instgram: "للأسف أنا بقالي فترة بيتم استغلال اسمي واسم بنتي في حروب وتريندات مالناش دعوة بيها وكنت ماسكة نفسي عن عدم الرد مهما حصل.. وأنا هرد على نقطة إنه بيصدر للإعلام إن البنت ممنوعة منه وهو هيموت ويشوفها، ومش هتكلم عن أي حاجة تانية، وده عشان عمري ما هبدأ بالكلام عن أي حاجة غير لو اضطريت زي دلوقتي".
وأضافت: "للأسف وبشهادة كل الناس اللي حواليا، الأب اللي عمال يتكلم عن محكمة الأسرة وحق الأب في رؤية بنته وكذا نقطة ومعايا الورق الرسمي لكل كلمة".
وتابعت: "اتركوني أعيش في سلام وهدوء أنا وبنتي وأمي ومش عايزة أي حاجة لأن أنا لست بالذكاء الكافي للتحدث في السوشيال ميديا، ومبعرفش ألعب ألاعيبها خالص وممكن أكون بعك".