«الدكتور قالي روح موّت نفسك.. ومش مسامح اتنين».. شاب ينهي حياته في الإسكندرية ويترك رسالة مؤثرة

الموجز   

أقدم شاب على إنهاء حياته في محافظة الإسكندرية، تاركًا رسالة مؤثرة إلى أصدقائه وأسرته طالبهم فيها بمسامحته والدعاء له.

وأشارت الرسالة التي تركها الشاب، الذي يدعى سامح محمد، صدمة أقاربه وحالة من الحزن على مواقع التواصل الاجتماعي.

وقال الشاب: "نفسي أي حد زعلته أو قصرت معاه يسامحني ويدعي لي، نفسي لما الإمام يسألكوا قبل صلاتكم عليا ما خطبي أكون فعلا حد كويس وتشهدوا ليا بدا قدام ربنا."

وأضاف: "أخويا هيحاول يلغي البوست ويقفل الأكاونت، مهما طلب منكم ده متسمعوش لو بتحبوني.. كلمات أضافها الشاب في رسالته، متابعًا: أتمنى لو حد في عمرة أو رايح حج تخلوه يعمل حسابي في دعائه وأتمنى لو يعمل لي عمرة أو حج وجزاه الله الفردوس الأعلى يارب، وأكد: مفيش حد من أصدقائي يحس بالذنب إنتوا ملكمش ذنب."

وواصل: "مش مسامح أي حد في اللي حالي دا وصله، آخر سطر كان مكتوب إنتوا السبب في انتحار واحد زيي عاش مظلوم، ويوم ما يموت يموت حرام، أنا آسف لو ضايقت حد بحاجة من اللي فيا، المشكلة إن اللي سمعته مش عبارة عن أغنية، ده أمر واقع هتلاقيه فيها وفيك وفيا."

وأوضح سامح في رسالته: "أنا حالة مريض متأخره ملاقاش معاه غير ضله، ومش مسامح أي حد في اللي حالي دا وصله، المرض بتاعنا آخره موت عشان ملهوش أدوية."

وأكمل: "مسامح كل الناس، ما عدا 2 دمروا حياتي بكل ما تحمله الكلمة من معاني وظلموني، أنا آسف مقدما لأي حد أذاه الخبر دا بس غصب عني، صبرت على قد ما قدرت، أتمنى تقولوا بخشوع اللهم اني سامحت سامح فيما فعله لي وإني أشهدك على هذا، اللهم اشفع له واعصمه من النار وادخله الفردوس الأعلى."

ووجه الشاب رسالة لطبيب ما قائلاً: "إنت حرام يتقال عليه دكتور، اللي يحكم على الناس من غير ما يسمع لهم ولا يشوفهم حتى، اللي يقول لمريضه اللي هو أنا لو عايز تموت نفسك روح، وبيقوله أنت مش مريض نفسي ولا جسدي، وفي نفس الوقت كاتبله 7 برشامات في اليوم لمدة 3 شهور تقريبا."

وتابع: "شكرا لكل حد ساعدني ولو بكلمة أو بدعوة في سره لأنه فعلا ساعدني أفضل عايش للحظة دي، ومحدش من صحابي يحس بالذنب لأن ملهمش ذنب."

ووفقا لرسالة سامح وأصدقائه، فإنه كان يعاني من أزمة نفسية ويعالج منها خلال الفترة الماضية لدى أطباء نفسيين في الإسكندرية.

وأعلنت النيابة العامة فتح تحقيق في ملابسات الحادث.

وتعمل الدولة على تقديم الدعم للمرضى النفسيين من خلال أكثر من جهة خط ساخن لمساعدة من لديهم مشاكل نفسية أو رغبة في الانتحار، أبرزها الخط الساخن للأمانة العامة للصحة النفسية، بوزارة الصحة والسكان، لتلقي الاستفسارات النفسية والدعم النفسي، ومساندة الراغبين في الانتحار، من خلال رقم 08008880700، 0220816831، طول اليوم.

كما خصص المجلس القومي للصحة النفسية خط ساخن لتلقي الاستفسارات النفسية 20818102، وأكدت دار الإفتاء المصرية، أن الانتحار كبيرة من الكبائر وجريمة في حق النفس والشرع، والمنتحر ليس بكافر، ولا ينبغي التقليل من ذنب هذا الجرم وكذلك عدم إيجاد مبررات وخلق حالة من التعاطف مع هذا الأمر، وإنما التعامل معه على أنه مرض نفسي يمكن علاجه من خلال المتخصصين.

تعليقات القراء